Aleanca për Ardhmërinë e Kosovës (AAK) mbajti mbledhjen e Kryesisë, ku u diskutuan zhvillimet aktuale politike në vend dhe procesi i brendshëm zgjedhor.
Sipas njoftimit të AAK-së, mungesa e rezultateve në qeverisje dhe mungesa e një agjende të qartë zhvillimore e bashkëpunuese fatkeqësisht po e shtyn vendin prapë drejt zgjedhjeve të jashtëzakonshme.
Gjatë mbledhjes u vlerësua se procesi i brendshëm zgjedhor po ecën sipas planifikimit dhe me përfshirje të gjerë të strukturave të partisë. Ky proces në nivel dege pritet të përfundojë më 10 maj, ndërsa më 24 maj do të mbahet Kuvendi i Përgjithshëm Zgjedhor.
Në këtë kuvend do të zgjidhen kryetari dhe strukturat e reja drejtuese të AAK-së.