Këshilli i Përgjithshëm i Aleancës për Ardhmërinë e Kosovës (AAK) mbajti të enjten, më 26 mars 2026, mbledhjen e 180-të, në të cilën vendosi vazhdimin e procesit të brendshëm zgjedhor në të gjitha nivelet e organizimit. Ky proces, i pezulluar më 6 mars 2026, rifillon konform vendimit të datës 12 shkurt 2026, më 27 mars 2026, dhe përfundon më 24 maj 2026 me mbajtjen e Kuvendit të Përgjithshëm të AAK-së.
Kreu i partisë, Ramush Haradinaj, tha se të gjitha degët në nivel vendi janë udhëzuar të fillojnë përgatitjet dhe organizimin e këtij procesi, në përputhje me aktet e brendshme të Aleancës.
Haradinaj deklaroi se ky është njëkohësisht proces i afrimit me qytetarët, i reformës së brendshme në parti dhe i fuqizimit të strukturave, me synim rritjen e përfaqësimit dhe konsolidimin e mëtejshëm të AAK-së në gjithë vendin.
Më parë, kreu i AAK-së kishte njoftuar se nuk do të rikandidojë për postin e kryetarit të partisë.