Komisioni Qendror i Zgjedhjeve (KQZ) i është përgjigjur shkresës me numër protokoll 709, datë 26 mars 2026, të deputetit të Partisë Socialiste, Erion Braçe, ku ai kërkonte rezultatet e tij elektorale si deputet për periudha të ndryshme.
KQZ ka vënë në dispozicion shifrat e performancës personale të Braçes për zgjedhjet parlamentare nga viti 2001 deri në 2021. Dokumenti, i nënshkruar nga kreu i KQZ-së, Ilirjan Celibashi, e rendit deputetin ndër politikanët më të votuar në shkallë vendi.
Sa i përket zgjedhjeve të viteve 1996 dhe 1997, KQZ sqaron se i është drejtuar Arkivit Qendror Shtetëror, i cili konfirmoi mungesën e këtyre dokumenteve në fondet e tij. Të dhënat përkatëse administrohen në arkivin e Kuvendit të Shqipërisë.
KQZ thekson se është krijuar në vitin 2001, prandaj informacionet e administruara fillojnë nga kjo periudhë.
Kjo përgjigje vjen në një kohë kur Erion Braçe ka shprehur hapur ambicien për të kandiduar për Bashkinë e Tiranës. Në zgjedhjet parlamentare të 11 majit 2025, ai fitoi mandatin e deputetit në Qarkun e Tiranës nga lista e hapur e Partisë Socialiste, duke marrë numrin më të lartë të votave në zonën e tij.