Komisioni Qendror i Zgjedhjeve (KQZ) zhvilloi sot mbledhjen e radhës dhe miratoi kufizimin e shpenzimeve të fushatës zgjedhore për subjektet politike që do të certifikohen për pjesëmarrje në zgjedhjet për Kuvendin e Kosovës.
Sipas këtij vendimi, një subjekt politik ka të drejtë të shpenzojë deri në 2,092,202 euro, pra 1 euro për çdo votues të regjistruar. Llogaritja bazohet në Rregulloren Zgjedhore nr. 07/2024 për fushatën zgjedhore, monitorimin dhe deklarimin financiar, si dhe në të dhënat e listës preliminare të votuesve, e cila regjistron 2,092,202 votues sipas ekstraktit të 30 prillit 2026.
Drejtori i Sekretariatit të KQZ-së, Besnik Buzhala, sqaroi procedurën. "Siç e dini, sipas planit kohor, fushata zgjedhore do të fillojë më 28 maj 2026 dhe do të përfundojë më 7 qershor 2026, para hapjes së qendrave të votimit. Andaj, në përputhje me Rregulloren Zgjedhore nr. 07/2024 për zgjedhjet për Kuvendin e Republikës së Kosovës, kufizimi i shpenzimeve është llogaritur në 1 euro për votues. Në lidhje me bazën ligjore, Zyra i rekomandon KQZ-së që të miratojë kufizimin e shpenzimeve të fushatës zgjedhore në vlerën prej 2,092,202 euro. Pra, kjo lidhet me numrin e votuesve në listën preliminare, sipas ekstraktit të marrë më 30 prill 2026", deklaroi ai.
Përditësime
Ushtruesja e detyrës së presidentes, Albulena Haxhiu, shpalli zgjedhjet pasi Kuvendi dështoi të zgjedhë presidentin deri më 28 prill, sipas Gjykatës Kushtetuese, dhe Kuvendi u shpërnda.
Këto janë zgjedhjet e treta brenda një vjeti e gjysmë për shkak të krizave politike.
KQZ votuan listën preliminare të votuesve dhe 48 qendra votimi jashtë Kosovës, sipas anëtarit Alban Krasniqi. Ai deklaroi se KQZ do të shqyrtrojë hapjen e qendrave në përfaqësi diplomatike.