Komisioni Qendror i Zgjedhjeve (KQZ) ka publikuar vendimin për alokimin e mjeteve financiare nga fondi për mbështetjen e subjekteve politike për gjysmën e dytë të vitit 2026. Nga shuma totale prej 2,113,735.89 euro, pjesa kryesore është ndarë proporcionalisht sipas numrit të mandateve të fituara në zgjedhjet e 7 qershorit, ndërsa 30,667.40 euro janë ndarë për kuotën gjinore.
Sipas vendimit, pas konstituimit të Kuvendit, 10% e fondit për mbështetjen e grupeve parlamentare do të caktohet përmes një vendimi të veçantë. Përfituesit kryesorë të fondeve janë:
- Lëvizja Vetëvendosje: 881,253.70 euro (49 deputetë)
- Partia Demokratike e Kosovës (PDK): 381,895.89 euro (22 deputetë)
- Lidhja Demokratike e Kosovës (LDK): 312,460.27 euro (18 deputetë)
- Lista Serbe: 156,230.14 euro (9 deputetë)
- Aleanca për Ardhmërinë e Kosovës (AAK): 121,512.33 euro (7 deputetë)
- Guxo: 52,076.71 euro (3 deputetë)
- Kosova Demokratik Türk Partisi: 34,717.81 euro (2 deputetë)
Subjektet e tjera parlamentare, të cilat përfaqësohen me nga një ulëse në Kuvend, do të përfitojnë nga 17,358.90 euro secila. Në këtë grup bëjnë pjesë: Alternativa, Nisma Socialdemokrate, Jedinstvena Goranska Partija, Koalicija Vakat, Nova Demokratska Stranka, Partia Liberale Egjiptiane, Partia Rome e Bashkuar e Kosovës, Partia e Ashkalinjve për Integrim (PSA), Socijaldemokratska Unija dhe Za Slobodu Pravdu i Opstanak.