Komisioni Qendror i Zgjedhjeve (KQZ) është në pritje të vendimit zyrtar për caktimin e datës së zgjedhjeve të parakohshme parlamentare. Kështu ka deklaruar zëdhënësi i këtij institucioni, Valmir Elezi, në intervista për media të ndryshme.
Valmir Elezi theksoi se organizimi i procesit zgjedhor do të realizohet në afate të shkurtra kohore. Ai sqaroi se një nga vendimet e para të KQZ-së, pas shpalljes së datës, do të jetë rishikimi dhe përshtatja e afateve të aktiviteteve zgjedhore sipas nevojës dhe rrethanave. Kjo bëhet në përputhje me Ligjin për Zgjedhjet e Përgjithshme, i cili i jep të drejtë KQZ-së të përshtasë afatet me kohën në dispozicion nga shpallja deri në ditën e votimit.
Plani i aktiviteteve zgjedhore rregullon çështjet kryesore të procesit, që lidhen me votuesit, subjektet politike dhe vëzhguesit. Midis tyre përcaktohen:
- Afati për partitë politike për të formuar koalicione dhe për të deklaruar mospjesëmarrjen në zgjedhje;
- Afati për certifikimin e subjekteve politike dhe dorëzimin e listave të kandidatëve për deputetë;
- Periudha e fushatës zgjedhore;
- Koha për regjistrimin e votuesve jashtë Kosovës, votimin përmes postës dhe në përfaqësi diplomatike;
- Regjistrimin e votuesve me nevoja të veçanta;
- Afatet për akreditimin e vëzhguesve vendorë, ndërkombëtarë dhe mediave.
Deklaratat e Valmir Elezi u bënë në emisione si Dukagjin, FIVE dhe për media si Epoka e Re, Bota Sot, Lajmi.net dhe Klankosova.tv.