Komisioni Qendror i Zgjedhjeve (KQZ) i ka dërguar Kuvendit të Kosovës një njoftim zyrtar me rekomandime për ndryshimin dhe plotësimin e Ligjit për Zgjedhjet e Përgjithshme. Letra e datës 24 prill 2026, e nënshkruar nga kryesuesi Kreshnik Radoniqi dhe e drejtuar kryetares së Kuvendit Albulena Haxhiu, vjen pas analizës së zgjedhjeve të fundit, ku u identifikuan sfida në organizimin dhe administrimin e procesit zgjedhor.
Një nga rekomandimet kryesore është ulja e numrit të votave preferenciale për kandidatë. Aktualisht, qytetarët mund të votojnë deri në 10 kandidatë, ndërsa KQZ propozon reduktimin në 5 ose 3. Sipas KQZ-së, një numër i lartë votash preferenciale e komplikon numërimin, e ngadalëson atë, rrit mundësinë për gabime dhe manipulime, si dhe paraqet vështirësi për vetë votuesit.
KQZ thekson se këto ndryshime janë të nevojshme veçanërisht në rast zgjedhjesh të reja të parakohshme, duke marrë parasysh afatet kushtetuese. Rekomandimet u miratuan me vendim të KQZ-së dhe tani i janë përcjellë Kuvendit për shqyrtim të mëtejshëm.
Përfaqësuesi i Institutit Demokratik të Kosovës (KDI), Eugen Cakolli, reagoi ndaj propozimit. Ai vlerësoi se reduktimi i numrit të kandidatëve të votueshëm duhet të trajtohet si pjesë e një reforme të mirëfilltë zgjedhore, por jo në prag të zhvillimeve politike.