Sipas të dhënave të Bankës së Shqipërisë, kreditimi i ekonomisë u ngadalësua në janar 2026. Sektori bankar dha gjithsej 28.3 miliardë lekë kredi të reja, në rënie me 11% krahasuar me janarin e vitit 2025.
Shifra e janarit përfaqëson vlerën e dytë më të lartë historike për këtë periudhë, pas niveleve rekord të vitit të kaluar. Ngadalësimi u përcaktua kryesisht nga segmenti i individëve, ku kredia e re arriti 8.7 miliardë lekë, rënie 8% në bazë vjetore.
Rënia lidhet me tkurrjen e kredisë në euro, si për blerje banesash ashtu edhe për konsum. Ndërkaq, kreditimi në lekë vazhdoi rritjen në të dy produktet kryesore. Për bizneset, kredia e re ishte 19.5 miliardë lekë, në nivele të përafërta me janarin e vitit të kaluar, me ecuri të ngjashme sipas monedhave.
Portofoli total i kredisë për ekonominë, i matur si tepricë, në fund të janarit arriti 939.3 miliardë lekë. Ai u tkurr me 4.4 miliardë lekë krahasuar me fundin e vitit 2025. Në bazë vjetore, portofoli rritet me 11.6%, me 18.3% për individët dhe 7.9% për bizneset.
Gjatë vitit 2025, kreditimi u rrit me ritme të shpejta, pavarësisht masave kufizuese të Bankës së Shqipërisë për kredinë në pasuri të paluajtshme, të cilat hynë në fuqi në mesin e vitit të kaluar.