Tedros Adhanom Ghebreyesus, drejtori i përgjithshëm i Organizatës Botërore të Shëndetësisë (OBSH), u kërkoi banorëve të Tenerife-s të qetësohen përpara mbërritjes së anijes turistike MV Hondius, ku është shfaqur një shpërthim i hantavirusit. Ai theksoi se "ky nuk është një tjetër Covid" dhe se rreziku për shëndetin publik mbetet i ulët.
Anija holandeze pritet të arrijë në portin e Granadilla-s, në Ishujt Kanarie, në orët e para të mëngjesit të së dielës. Kjo ka shkaktuar shqetësim te banorët lokalë. Deri tani janë konfirmuar 6 raste hantavirusi mes pasagjerëve, përfshirë një nga tre personat që humbën jetën gjatë lundrimit nga Amerika e Jugut.
Zyrtarët spanjollë kanë shpjeguar masat parandaluese dhe të izolimit. Pasagjerët do të qëndrojnë në bord dhe do të largohen vetëm nën kontroll. Bashkimi Evropian dhe shtetet përkatëse organizojnë fluturime riatdhesimi për shtetasit.
Hantaviruset transmetohen zakonisht nga brejtësit. Varianti Andes, i marrë sipas OBSH-së nga disa pasagjërë në Amerikën e Jugut, mund të kalojë nga njeriu te njeriu. Simptomat përfshijnë temperaturë, lodhje ekstreme, dhimbje muskujsh, dhimbje stomaku, të vjella, diarre dhe vështirësi në frymëmarrje.
Në bordin e anijes ndodhet eksperti i OBSH-së, Dr. Freddy Banza-Mutoka, së bashku me dy mjekë holandezë. Ata kryejnë vlerësime mjekësore dhe analiza ekspozimi për të gjithë personat në bord. Aktualisht nuk ka pasagjerë me simptoma.