Organizata Botërore e Shëndetësisë (OBSH) ka konfirmuar zyrtarisht përfundimin e epidemisë së shkaktuar nga virusi i Andeve, një formë e rrallë e hantavirusit, që preku pasagjerët e anijes MV Hondius. Ngjarja, e cila u shfaq gjatë një lundrimi të nisur më 1 prill nga Argjentina drejt Kepit të Gjelbër, përfundoi pas gati tre muajsh monitorimi shëndetësor.
Sipas njoftimit zyrtar, personi i fundit që mbahej nën mbikëqyrje si kontakt i ngushtë ka përfunduar karantinën dhe ka rezultuar negativ. Nga rastet e konfirmuara, 8 pacientë janë shëruar dhe janë larguar nga spitali, ndërsa 2 persona mbeten ende në trajtim mjekësor, përkatësisht në Afrikën e Jugut dhe në Francë. Drejtori i Përgjithshëm i OBSH-së, Tedros Adhanom Ghebreyesus, theksoi se institucioni do të vijojë bashkëpunimin me autoritetet ndërkombëtare për të analizuar shkaqet e këtij shpërthimi.
OBSH shprehu mirënjohje për mbështetjen e shteteve në menaxhimin e situatës, duke përfshirë Argjentinën, Kepin e Gjelbër, Kilin, Holandën, Afrikën e Jugut dhe Mbretërinë e Bashkuar, si dhe Spanjën për ndihmën e dhënë gjatë evakuimit dhe riatdhesimit të personave në Tenerife.
Sa i përket anijes MV Hondius, ajo mori lejen për t'u rikthyer në shërbim gjatë mesin e muajit qershor. Agjencia holandeze e shëndetit publik, në një përditësim të datës 30 maj, deklaroi se pas kryerjes së inspektimeve të detajuara, nuk ekzistonte më asnjë pengesë shëndetësore për rifillimin e veprimtarisë së anijes.
Përditësime
Organizata Botërore e Shëndetësisë (OBSH) ka shpallur zyrtarisht përfundimin e periudhës 42-ditore të monitorimit pas rastit të hantavirusit në anijen MV Hondius. Autoritetet shëndetësore kanë gjurmuar mbi 650 kontakte në 33 vende, përfshirë 18 shtetas amerikanë. Hetimet konfirmojnë se virusi u kontraktua në Patagoni, ku viktima e parë ndërroi jetë më 11 prill. Aktualisht, po zhvillohet një studim ndërkombëtar në 21 vende me synim përmirësimin e diagnostikimit dhe përshpejtimin e kërkimit për një vaksinë.