Organizata Botërore e Shëndetësisë (OBSH) ka njoftuar konfirmimin e rastit të 12-të me hantavirus, pas testimit pozitiv të një anëtari të ekuipazhit në Holandë. Ky shpërthim është lidhur me anijen turistike MV Hondius, e cila kishte nisur lundrimin më 1 prill nga Ushuaia e Argjentinës, drejt Kepit Verde dhe Tenerifes në Ishujt Kanarie.
Drejtori i Përgjithshëm i OBSH-së, Tedros Adhanom Ghebreyesus, gjatë një konference për media në Gjenevë, u ka bërë thirrje shteteve që të vazhdojnë monitorimin e pasagjerëve dhe ekuipazhit që kanë udhëtuar me anijen në fjalë. Ai kërkoi zbatimin rigoroz të masave të karantinës dhe të kontrollit shëndetësor për të ndaluar përhapjen e virusit.
Sipas të dhënave zyrtare, nuk është raportuar asnjë viktimë e re që nga 2 maji, periudhë kur shpërthimi u raportua për herë të parë në OBSH. Deri më tani janë regjistruar gjithsej 3 viktima, ndërsa mbi 600 persona në 30 vende të ndryshme mbeten nën monitorim.
Në Holandë, Instituti Kombëtar për Shëndetin Publik dhe Mjedisin (RIVM) njoftoi se pacienti është izoluar dhe se rezultatet pozitive janë konfirmuar nga dy laboratorë. Institucioni vlerësoi se rreziku për përhapje të mëtejshme brenda vendit mbetet i ulët. Autoritetet shëndetësore ndërkombëtare po vijojnë hetimet për mënyrën e përhapjes së virusit në bordin e anijes.