Fatih Birol, drejtor ekzekutiv i Agjencisë Ndërkombëtare të Energjisë (IEA), deklaroi se kriza aktuale e naftës dhe gazit, e shkaktuar nga bllokimi i Ngushticës së Hormuzit nga Irani, është më serioze se krizat e viteve 1973, 1979 dhe 2022. Në intervistë për gazetën franceze Le Figaro, ai theksoi se bota nuk ka përjetuar kurrë një ndërprerje të furnizimit me energji në këtë përmasë.
Ngushtica e Hormuzit, përmes së cilës kalon rreth 20% e naftës dhe gazit botëror, u bllokua pothuajse plotësisht si përgjigje ndaj sulmeve nga Izraeli dhe SHBA. Kjo ka çuar në rritje të çmimeve globale. Të martën, çmimet e naftës u ngritën me 1.4%, duke arritur mbi 111 dollarë për fuçi.
Birol vlerësoi se vendet europiane, Japonia dhe Australia janë të ekspozuara, por vendet në zhvillim do të preken më fort për shkak të çmimeve më të larta të naftës, gazit, ushqimeve dhe përshpejtimit të inflacionit. Vendet anëtare të IEA-së ranë dakord muajin e kaluar të lirojnë pjesë nga rezervat e tyre strategjike, proces që po vazhdon.
Shqetësimet u rritën pas kërcënimit të Iranit për mbylljen e ngushticës Bab el-Mandeb. Presidenti amerikan Donald Trump i ka dhënë të martën si afat të fundit Iranit për rihapjen e Hormuzit, duke paralajmëruar se ndryshe do të shkatërrojë ura dhe termocentrale iraniane.
Përditësime
Donald Trump deklaroi se "një qytetërim i tërë do të vdesë sonte", çka çoi në rritje të menjëhershme të çmimeve të naftës.
- Nafta bruto amerikane arriti 114.81 dollarë për fuçi.
- Brent kaloi 110 dollarë për kontratat e qershirit.
Irani refuzoi propozimin e SHBA-së për armëpushim dhe ndërpreu të gjitha kanalet diplomatike si dhe komunikimet indirekte.
Trump lë të hapur mundësinë për marrëveshje dhe negociata.