Ministria e Mbrojtjes e Kroacisë ka reaguar ndaj shqetësimeve të shprehura vazhdimisht nga presidenti serb Aleksandar Vuçiç për marrëveshjen e sigurisë mes Kroacisë, Shqipërisë dhe Kosovës.
Sipas deklaratës zyrtare, marrëveshja trepalëshe po keqinterpretohet qëllimisht nga Beogradi. Ministri Ivan Anušić ka sqaruar se dokumenti nuk ka të bëjë me aktivitete luftarake, por shërben si kornizë për bashkëpunim teknik, shkëmbim njohurish dhe koordinim mes industrive të mbrojtjes, me qëllim stabilitetin rajonal.
Ministria kroate ka rikujtur marrëveshjen e vitit 2010 mes Serbisë dhe Kroacisë, e cila është më gjithëpërfshirëse dhe më e detajuar se kjo trepalëshe. Sipas tyre, fakti që Vuçiç nuk e përmend këtë dokument tregon një qasje selektive.
Bashkëpunimi me Shqipërinë dhe Kosovën fokusohet te mbështetja për rrugën e tyre drejt institucioneve europiane dhe transatlantike, si NATO dhe Bashkimi Evropian. Kroacia, si anëtare sovrane e këtyre organizatave, ndjek politikën e saj të pavarur dhe mbetet e përkushtuar ndaj bashkëpunimit transparent rajonal.
Sa i përket paralajmërimeve të Vuçiç për armatosje të mëtejshme të Serbisë, Anušić ka bërë të qartë se Kroacia nuk ndjen shqetësim nga këto deklarata.
Ministria e Mbrojtjes e Shqipërisë ka bërë të ditur se çdo informacion mbi marrëveshjen është publik dhe i disponueshëm në faqen zyrtare. NATO ka kërkuar nga Serbia të veprojë me përgjegjësi ndaj aleancës dhe fqinjëve të saj për të ruajtur stabilitetin rajonal.
Përditësime
Kroacia ka sqaruar se marrëveshja trepalëshe u nënshkrua në mars 2025. Ajo mbulon katër fusha kryesore të bashkëpunimit:
- Promovimin e aftësive mbrojtëse dhe industrisë mbrojtëse;
- Rritjen e ndërveprueshmërisë përmes arsimit, trajnimit dhe ushtrimesh;
- Adresimin e kërcënimeve hibride dhe forcimin e qëndrueshmërisë;
- Mbështetjen për integrimin euroatlantik.
Bashkëpunimi synon rritjen e sigurisë dhe stabilitetit në Evropën Juglindore.