Kryebashkiaku i Athinës, Haris Doukas, ka ngritur alarmin për zhvillimin e pakontrolluar turistik në qendër të qytetit. Në një intervistë, ai theksoi se Athina nuk mund të funksionojë si një "hotel gjigant" dhe se nevojiten kufizime dhe rregulla për të ruajtur autenticitetin e lagjeve historike.
Vitin e kaluar, Athinën e vizituan mbi 8 milionë turistë, një rekord për kryeqytetin grek, i cili më parë shihej kryesisht si ndalesë tranziti drejt ishujve. Në lagjen Plaka, poshtë Akropolit, qëndrimet në qirave afatshkurtra janë më shumë se dyfishuar që nga viti 2018, sipas një studimi të porositur nga bashkia. Kjo ka çuar në rritje të qirave, largim të banorëve vendas dhe mbingarkesë të infrastrukturës.
Qyteti ka rreth 700 mijë banorë, por presioni nga turistët është i jashtëzakonshëm. Doukas, i zgjedhur në vitin 2024 me mbështetjen e partisë opozitare PASOK, ka premtuar të "gjelbërojë" Athinën, duke mbjellë rreth 3.800 pemë në qendër. Ai po përpiqet të frenojë ndërtimet shumëkatëshe pranë Akropolit dhe investimet e reja turistike.
Bashkia po ndërton infrastrukturë të re, duke përfshirë rrjete energjetike, sisteme uji, kanalizime dhe 5G. Doukas deklaroi se do të ndalojë çdo investim të ri në zonën e Plakës, duke ndjekur modele si ai i Barcelonës, ku parashikohet ndalimi i qirave afatshkurtra nga viti 2028. Zyrtarët theksojnë se koha është thelbësore për të shmangur që Athina të bjerë viktimë e suksesit të vet.