Ish-kryetarja e LSI-së, Monika Kryemadhi, ka publikuar një video në rrjetet sociale, përmes së cilës ka hedhur akuza të drejtpërdrejta ndaj ish-aleatit të saj, Lulzim Basha. Ajo pretendon se Basha qëndron pas një fushate denigruese të ushtruar përmes disa portaleve ndaj saj dhe familjes së saj.
Në mesazhin e saj, Kryemadhi deklaroi se ka zbuluar burimet financiare të këtyre mediave, duke i lidhur ato me Lulzim Bashën. Ajo u shpreh se këta individë, të cilët i cilësoi si "pseudogazetarë", shfrytëzojnë lidhjet e tij për të zhvilluar fushatën shpifëse.
Krahas akuzave për fushatën mediatike, Kryemadhi u ndal edhe te dosja për lobimin rus në SHBA. Ajo theksoi se megjithëse çështja ka qëndruar në zyrat e SPAK, ajo mbetet aktive.
"Dosja e financimit rus për lobim në SHBA vërtet ka zënë pluhur në zyrat e SPAK, por nuk është mbyllur dhe një ditë do të hapet", u shpreh ajo. Kryemadhi u bëri thirrje gazetarëve të jenë të kujdesshëm për origjinën e parave që marrin, duke sugjeruar se ato mund të jenë të lidhura me burime ruse, gjë që sipas saj, mund të dëmtojë integritetin e medias.