Monika Kryemadhi kundërshtoi akuzat e SPAK-ut gjatë seancës paraprake në gjykatë. Ajo ironizoi duke thënë: "kur ju pretendoni që babai im ka falsifikuar dokumentet e banesës, unë dilja në protestë për të liruar Fatos Nanon dhe më pas dashuroja Ilir Metën".
Ish-deputetja hodhi poshtë ekspertizën financiare të prokurorisë së posaçme për të ardhurat e çiftit dhe kërkoi riekspertim. Ajo kërkoi gjithashtu rikthimin e telefonit të sekuestruar në shkelje të procedurës, pasi në atë kohë ishte deputete. Gjykata pranoi kërkesën për telefonin.
Për kërkesat kryesore, si rikthimi i çështjes për hetime të mëtejshme – përfshirë pyetjen e Ardian Shatkan dhe përfaqësuesve të GSI-së, si dhe hapja e mesazheve dhe komunikimeve me Edi Ramën për ligjin e minierave – gjykata do të vendosë më 5 mars.
Ashtu si ish-bashkëshorti i saj Ilir Meta, Kryemadhi pretendoi se hetimet janë të montuara. Meta, i cili kreu parashtrimet pak ditë më parë, u shpreh se është i pranishëm për shkaqe politike dhe se nuk ekziston asnjë dokument i firmosur. Avokati i tij Cakrani theksoi se nuk ka asnjë fakt në dosjen penale.
Gjatë seancës u dëgjuan edhe parashtrimet e Pirro Xhixho, Ema Çoku dhe Fatime Kryemadhi. Më herët, SPAK ka kërkuar gjykimin e tyre për dyshimet e korrupsionit dhe pastrimit të parave.