Albin Kurti, kryeministër i Republikës së Kosovës, i ka drejtuar një letër presidentit të Federatës së Futbollit të Kosovës (FFK), Agim Ademi, më 1 prill 2026. Në të shpreh mirënjohje dhe mbështetje për Kombëtaren e Kosovës dhe stafin teknik pas fushatës kualifikuese për Kupën e Botës 2026.
FFK e publikoi letrën në faqen e saj zyrtare. Kryeministri falënderon stafin teknik, veçanërisht trajnerin Franco Foda, për paraqitjen në kualifikime. Ai pranon se humbja e fundit dhemb, sidomos kur ekipi ishte afër suksesit, por puna, përkushtimi dhe serioziteti i ekipit nuk zbehen nga një ndeshje.
Kurti vlerëson se ekipi ka krijuar besim te një komb i tërë, arritje më e madhe se rezultati i vetëm. Ai i fton të fokusohen te rezultati final dhe të vazhdojnë me vendosmëri drejt Kampionatit Evropian, duke theksuar se janë afër dhe bashkë në çdo hap.
Letra e plotë:
Përshëndetje Kryetar,
Të lutem pranoje dhe përcille tutje një falënderim të madh për gjithë stafin teknik, e në veçanti për trajnerin Franco Foda, për paraqitjen në fushatën kualifikuese për Kupën e Botës.
E di që humbja e djeshme dhemb. Sidomos kur ishim aq afër. Por puna, përkushtimi dhe serioziteti që janë ndërtuar në këtë ekip nuk humbin brenda një ndeshjeje.
Keni krijuar ekip që i dha besim një kombi të tërë. Kjo është shumë më e madhe se rezultati. Por tutje, rezultati final është ai në çka duhet të fokusohemi. Ju lutem t’i qëndroni fort rrugëtimit drejt Kampionatit Evropian.
Jemi shumë afër dhe jemi bashkë në çdo hap.
Kryeministri i Republikës së Kosovës
Albin Kurti