Albin Kurti, kryeministri i Republikës së Kosovës, vizitoi të dielën, më 30 mars 2026, kampin e Kombëtares së Kosovës në futboll për ta përgëzuar ekipin për arritjen në finalen e play-off-it për Kupën e Botës 2026 dhe për t’i ofruar mbështetje para ndeshjes me Turqinë, e cila do të zhvillohet të martën mbrëma në stadiumin Fadil Vokrri në Prishtinë.
Fillimisht, kryetari i Federatës së Futbollit të Kosovës (FFK), Agim Ademi, e falënderoi kryeministrin Kurti, ministrin e Sportit Blerim Gashiani dhe zëvendësministrën Daulina Osmani për përkrahjen e vazhdueshme ndaj ekipit kombëtar.
Në fjalën e tij para futbollistëve dhe stafit, Kurti i uroi Dardanët për fitoren historike në Bratislavë dhe theksoi se rrugëtimi deri në finale është plotësisht i merituar. Ai vuri në pah statistikat, duke përmendur 10 gola të shënuar në 7 ndeshje, si dhe fitoret ndaj Suedisë, Sllovenisë, Islandës dhe Sllovakisë gjatë vitit të fundit.
Kurti e nënvizoi punën, përkushtimin dhe unitetin e skuadrës. Për kundërshtarin, ai u tha futbollistëve: “Mos e shikoni kundërshtarin më shumë se sa veten. Ju e keni kundërshtarin e fortë të martën mbrëma, por ata e kanë kundërshtarin më të fortë se ju, e ai jeni pikërisht ju djemtë e Kosovës.”
Kryeministri lidhi suksesin sportiv me progresin e shtetit të Kosovës në dekadën e fundit. Ai shtoi se kualifikimi në Kupën e Botës do ta vendosë Kosovën në qendër të vëmendjes globale, me miliona shikues në botë. “Përmes juve si ekip e kemi mundësinë ta vendosim Kosovën dhe historinë e saj të qëndresës e talentit në sytë e mbarë njerëzimit. Pas jush është jo vetëm një shtet, por një komb i tërë. Janë tifozët në stadium, janë familjet tuaja, janë qytetarët në çdo banim, fshat e qytet dhe janë të gjithë shqiptarët kudo në botë. Kjo mbështetje masive është forca juaj dhe merreni me vete në fushë. Dhe mos harroni, besimin për fitore në këtë finale e keni ndërtuar ju si ekip, me trajnerin dhe gjithë stafin udhëheqës dhe mbështetës.”