Kryeministri i Shqipërisë, Edi Rama, është nderuar me medaljen më të lartë shtetërore të Emirateve të Bashkuara Arabe, e cila mban emrin e themeluesit të vendit, Sheikh Zayed. Ky vlerësim u akordua nga Presidenti Sheikh Mohammed bin Zayed Al Nahyan gjatë një ceremonie në Abu Dhabi në kuadër të Samitit të Zhvillimit të Qëndrueshëm. Çmimet u ndanë për projekte në fusha si përmirësimi i arsimit, sigurimi i ujit të pijshëm, mbështetja ushqimore për komunitetet në nevojë, si dhe nisma për ndryshimet klimatike dhe mbrojtjen e mjedisit.
Në një postim në rrjetet sociale, Edi Rama shprehu emocionin e tij për këtë nderim. Ai tha se ndihet thellësisht i prekur nga surpriza dhe vlerësimi i jashtëzakonshëm. "Akordimi i medaljes më të lartë të vendit mik, e cila mban emrin e themeluesit të Emirateve të Bashkuara, Sheikut Zayed, është respekti dhe vlerësimi më i madh për një kryeministër shqiptar", shkroi Rama. Ai e pranoi medaljen me përulësi dhe krenari për Shqipërinë, duke shprehur mirënjohje të thellë ndaj Presidentit Sheikh Mohammed bin Zayed Al Nahyan, të cilin e cilësoi si mik të madh të shqiptarëve. Gjithashtu, falënderoi qytetarët shqiptarë që i kanë besuar udhëheqjen dhe përfaqësimin e vendit.
Ky vlerësim nxjerr në pah bashkëpunimin mes Shqipërisë dhe Emirateve të Bashkuara Arabe në fusha të zhvillimit të qëndrueshëm. Postimi i Ramës u shoqërua me fotografi nga takimi me Presidentin e Emirateve.