Kryeministri Edi Rama ka reaguar në lidhje me situatën e krijuar nga reshjet e dëborës në qarkun e Korçës. Përmes postimeve në rrjetet sociale, ai ka theksuar se strukturat përkatëse kanë qenë në terren për garantimin e qarkullimit rrugor dhe sigurisë së banorëve.
Sipas Ramës, mjetet fadroma dhe punëtorët kanë punuar gjatë gjithë natës dhe kanë vazhduar herët në mëngjes. Kjo ka mundësuar pastrimin e oborreve në kopshte dhe shkolla, si dhe heqjen e akullit nga ambientet përreth, për të siguruar mbarëvajtjen e procesit mësimor. Në qytet dhe në Njësitë Administrative nuk ka problematika.
Në zonat malore, fadromat vijojnë punën për pastrimin dhe hapjen e rrugëve në fshatra. Punonjësit e Bashkisë Korçë kanë kryer kriposjen e të gjitha rrugëve, si në qytet ashtu edhe në njësitë administrative, me ndërhyrje të posaçme në zonat ku reshjet kanë qenë më të dendura dhe ngricat më të pranishme.
Qarkullimi rrugor është mbajtur i hapur dhe monitorohet në mënyrë të vazhdueshme nga strukturat përkatëse. Bashkia Korçë u bën thirrje banorëve të tregojnë kujdes gjatë lëvizjes, për shkak të temperaturave të ulëta dhe pranisë së ngricave në akset rrugore.