Reshjet intensive të shiut, të shoqëruara me erë të fortë dhe breshër, kanë shkaktuar problematika në disa zona të Qarkut të Korçës. Sipas njoftimeve nga Prefektura dhe strukturat e Emergjencave Civile, ekipet operacionale kanë ndërhyrë për normalizimin e situatës.
Pasqyra sipas bashkive:
• Bashkia Maliq: Janë regjistruar rrëzime pemësh mbi automjete në fshatin Rëmbec dhe në qytetin e Maliqit. Në fshatin Orman ka pasur reshje breshëri, por nuk raportohen dëme në kulturat bujqësore.
• Bashkia Devoll: Një pemë u rrëzua në aksin rrugor drejt fshatit Progër, duke bllokuar përkohësisht qarkullimin. Forcat e Stacionit të Mbrojtjes nga Zjarri dhe Shpëtimit kanë bërë të mundur pastrimin e rrugës.
• Bashkia Pustec: Raportohet ndërprerje e furnizimit me energji elektrike në katër fshatra. Ekipet e OSHEE ndodhen në terren për riparimin e defekteve.
• Bashkia Kolonjë: Reshje breshëri janë evidentuar në fshatin Kamnik (Njësia Administrative Barmash), por pa dëme të raportuara.
• Bashkia Pogradec dhe Bashkia Korçë: Situata paraqitet e qetë dhe nuk janë konstatuar problematika apo dëme materiale deri më tani.
Strukturat e emergjencës mbeten në gatishmëri për të monitoruar zhvillimet e motit dhe për të ndërhyrë në çdo rast nevoje.
Përditësime
Dëmet e shkaktuara nga moti i keq në rajonin e Korçës janë më të gjera se sa ishte raportuar fillimisht. Zhvillimet kryesore janë:
• Autoritetet lokale konfirmuan dëme të konsiderueshme në vreshtat e fshatit Kamnik, Kolonjë.
• Fermerët në Maliq raportuan dëme në kulturat e grurit dhe shprehën pakënaqësi për mungesën e dëmshpërblimeve për dëmet e këtij viti dhe ato të mëparshme.
• Policia e Shtetit dhe banorët zhbllokuan qarkullimin në Rëmbec, pas rënies së një peme në rrugë.