Kryeministri i Shqipërisë, Edi Rama, zhvilloi një takim zyrtar në Pallatin Elysee me Presidentin e Francës, Emmanuel Macron. Përmes një mesazhi në rrjetet sociale, Macron vlerësoi dinamikën e marrëdhënieve dypalëshe, duke e cilësuar takimin si një dëshmi të afërsisë midis dy vendeve.
Presidenti francez theksoi se bashkëpunimi ndërmjet Shqipërisë dhe Francës po zgjerohet në fusha kyçe si inovacioni, arsimi, arsimi i lartë, kultura dhe turizmi. Palët shprehën vullnetin për t'i dhënë një shtysë të re marrëdhënieve, duke intensifikuar bashkëpunimin edhe në sektorin e ekonomisë dhe atë të mbrojtjes.
Macron riafirmoi mbështetjen e Francës për procesin e integrimit europian të Shqipërisë. Ai nënvizoi rëndësinë e vazhdimit të reformave të nevojshme, të cilat do t'i mundësojnë vendit avancimin e mëtejshëm në rrugën drejt Bashkimit Europian.
Përditësime
Kryeministri Edi Rama dhe Presidenti Emmanuel Macron zhvilluan një drekë pune dy-orëshe në Pallatin Elysee. Bisedimet u fokusuan në tri shtylla kryesore: sigurinë në Europë dhe koordinimin brenda NATO-s, procesin e zgjerimit të Bashkimit Europian, si dhe qasjen e re për reformat në Ballkanin Perëndimor.
Kryeministri Edi Rama u prit sot në Pallatin Elysee nga Presidenti Emmanuel Macron. Takimi u fokusua në zgjerimin e bashkëpunimit dypalësh dhe përshpejtimin e projekteve strategjike në Shqipëri, me theks te:
- Finalizimi i detajeve për ndërtimin e Liceut Francez në Korçë.
- Monitorimi i zbatimit të marrëveshjeve në sektorët e energjisë, turizmit dhe inovacionit, të iniciuara gjatë vizitës së Presidentit Macron në Tiranë.