Kryeministri Edi Rama ka zhvilluar një takim me Presidentin e Francës, Emmanuel Macron, në Paris, ku në fokus të bisedimeve ka qenë avancimi i projekteve dypalëshe. Kryeministri theksoi se projekti për rilindjen e Liceut Francez të Korçës ndodhet tashmë në tryezën e kreut të shtetit francez dhe është vendosur nën kujdesin e tij pas vizitës historike në Tiranë.
Sipas njoftimit zyrtar, ky institucion do të shndërrohet në një qendër ekselence për teknologjinë dhe inovacionin, duke u shërbyer nxënësve shqiptarë dhe të rinjve nga rajoni i Ballkanit. Modeli arsimor do të mundësojë marrjen e diplomave të dyfishta, të Maturës Shtetërore dhe të Baccalauréat Français, të cilat do të njihen si në Shqipëri, ashtu edhe në Francë.
Kryeministri Rama vlerësoi forcimin e marrëdhënieve mes dy vendeve, duke e cilësuar bashkëpunimin aktual si një zhvillim të rëndësishëm. Ai deklaroi se një dekadë më parë do të ishte e paimagjinueshme që Franca të kujdesej për një projekt të tillë në Shqipëri dhe që vendi ynë të konsiderohej partner strategjik i francezëve në rajon.