Në Dhomat e Specializuara të Kosovës (DHSK) në Hagë, Prokuroria ka filluar deklaratat përmbyllëse në rastin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.
Fjala përmbyllëse e Prokurorisë u dha nga kryeprokurorja e specializuar Kimberly West, e cila e quajti këtë rastin më të madh të trajtuar nga gjykata. Është hera e parë që ajo jep një deklaratë të tillë.
Kimberly West deklaroi se gjykata ka dëshmuar se klima e frikësimit të dëshmitarëve mund të menaxhohet. “Kemi dëshmuar se klima e frikësimit mund të menaxhohet në një mënyrë që siguron që e vërteta do të dëgjohet. Jemi bërë një gjykatë funksionale e suksesshme në një periudhë relativisht të shkurtër”, tha ajo.
Ajo falënderoi viktimat dhe dëshmitarët si më meritorët. “Falënderimet më të përzemërta i ruaj për ata që e kanë merituar më tepër. Për ata që kanë marrë barrën në shpatullat e tyre për të siguruar që sundimi i ligjit i ofrohet popullit të Kosovës dhe e kam fjalën posaçërisht për viktimat dhe dëshmitarët të cilët kanë ardhur sipas kësaj Gjykate për të dhënë dëshmitë e tyre”, u shpreh West.
Kryeprokurorja theksoi bashkëpunimin e tyre pavarësisht pengesave. “Pavarësisht frikave, kërcënimeve, stigmave dhe pavarësisht situatave me të cilat janë përballur këta dëshmitarë, familjet e tyre nga një grup i kufizuar por me zë në Kosovë, këta dëshmitarë e kanë dëshiruar kaq shumë të vërtetën që të dalë në pah sa pavarësisht të gjitha pengesave kanë zgjedhur që të bashkëpunojnë me zyrën time dhe të japin dëshmi përpara kësaj gjykate”, shtoi ajo.
Sipas saj, kjo përpjekje ndihmon në krijimin e një historiku të besueshëm të ngjarjeve të viteve 1998-1999, ku mbi 100 persona janë vrarë dhe qindra të tjerë abuzuar.