Kryesia e Kuvendit të Kosovës ka nisur mbledhjen e radhës më 8 prill 2026, në të cilën pritet të shqyrtohen çështje procedurale dhe të përcaktohet rendi i ditës për seancën plenare të ardhshme.
Anëtarët e Kryesisë shqyrtuan dhe miratuan procesverbalin e mbledhjes së mëparshme.
Pika kryesore është propozimi për rendin e ditës së seancës plenare, e cila parashikon:
- Miratimin e procesverbalit të seancës së kaluar;
- Deklarimet jashtë rendit të ditës dhe pyetjet parlamentare;
- Shqyrtimin dhe votimin e projektligjeve për ratifikimin e marrëveshjeve ndërkombëtare të kredisë me Asociacionin Ndërkombëtar për Zhvillim, Agjencinë Franceze për Zhvillim dhe KfW. Këto marrëveshje lidhen me zhvillimin e sektorit financiar, energjinë, klimën, lehtësimin e tregtisë dhe transportit në Ballkanin Perëndimor;
- Votimin e propozim-rezolutës për rritjen e çmimeve të naftës, mungesën e ndërhyrjes së Qeverisë dhe ndikimin në koston e jetesës si dhe stabilitetin ekonomik;
- Zgjedhjen e një anëtari joprokuror në Këshillin Prokurorial të Kosovës;
- Shqyrtimin e propozim-rezolutës për mbrojtjen e së vërtetës historike të luftës në Kosovë 1998–1999;
- Propozimin e Grupit Parlamentar të AAK-së për emërimin e deputetes Duda Balje në komisione parlamentare.
Përditësime
Kryesia e Kuvendit të Kosovës caktoi seancën plenare të radhës për të premten, 10 prill 2026, në orën 10:00.
Kryesia nuk arriti konsensus për rendin e ditës, të cilin Kryetarja e Kuvendit do ta propozojë në seancë.
Pika e parë është miratimi i rendit të ditës.
Kryesia e Kuvendit të Kosovës përfshiu në rendin e ditës:
- Projektligjet 10/L-015 (Zhvillimi i Sektorit Financiar), 10/L-016 (Energjia dhe Klima), 10/L-017 dhe 10/L-018 (Lehtësimi i Tregtisë dhe Transportit 2.0).
- Propozimin e grupeve parlamentare PDK-së dhe AAK-së për emërimin e deputetëve në komisione.
Kryesia e Kuvendit të Kosovës diskuton përplasjet mbi rezolutën e PDK-së për mbrojtjen e vlerave të Luftës 1998-1999 dhe trajtimin e viktimave.
- Ratifikimet përfshijnë detaje shtesë për programin e kredisë së AFD-së të bazuar në politika.