Kryesia e Partisë Demokratike të Kosovës (PDK) u mblodh më 24 mars 2026 për të diskutuar zhvillimet e fundit politike, situatën institucionale në vend dhe procesin e riorganizimit të brendshëm të partisë.
Gjatë mbledhjes, kryesia vlerësoi se papërgjegjësia e shumicës parlamentare ka prodhuar një situatë të panevojshme dhe të dëmshme për stabilitetin e vendit. PDK beson se rruga e vetme për dalje nga kjo situatë është kthimi te qytetari përmes zgjedhjeve të reja, të cilat do t’i japin vendit institucione me legjitim të plotë dhe drejtim të qartë politik.
Kryetari Bedri Hamza theksoi se procesi i riorganizimit brendshëm të partisë lidhet drejtpërdrejt me gatishmërinë për të ofruar një alternativë serioze dhe të përgjegjshme qeverisëse. "PDK po riorganizohet për të qenë më afër qytetarëve dhe për të ndërtuar një ofertë të qartë politike që garanton stabilitet dhe zhvillim. Kosova ka nevojë për institucione funksionale dhe vendimmarrje të përgjegjshme, jo për improvizime dhe kriza të njëpasnjëshme", deklaroi ai.
Kryesia shprehu shqetësim për gjendjen ekonomike në vend, duke vlerësuar se Qeveria dështon të adresojë problemet reale të qytetarëve. Sipas një burimi, bllokada politike nga Lëvizja Vetëvendosje lidhur me çështjen e presidentit është faktor kryesor.
PDK rithekson përkushtimin për stabilitet institucional, zhvillim ekonomik dhe mirëqenie qytetare, duke u angazhuar për një qasje të përgjegjshme dhe gjithëpërfshirëse që rikthen besimin në institucione dhe perspektivën e qartë për vendin.