Kryesia e Partisë Demokratike të Kosovës (PDK) ka mbajtur mbledhjen e radhës, ku fokusi kryesor ishte konsolidimi organizativ dhe procesi i zgjedhjeve të brendshme. Sipas njoftimit zyrtar, ky proces do të organizohet në përputhje me Statutin e partisë dhe parimet e demokracisë së brendshme, duke vënë theksin te transparenca dhe gara e ndershme.
Kryesia vlerësoi se ky proces zgjedhor përbën një mundësi të rëndësishme për fuqizimin e strukturave, përfshirjen e energjive të reja dhe ndërtimin e një partie më të bashkuar e më të përgatitur për sfidat politike. PDK konfirmoi pozitën e saj si forca kryesore opozitare, duke mbajtur numrin më të madh të deputetëve në Kuvendin e Kosovës.
Një tjetër temë e diskutuar ishte procesi gjyqësor që po zhvillohet në Dhomat e Specializuara në Hagë. Kryesia ritheksoi qëndrimin e saj se pret një vendim lirues për ish-krerët e Ushtrisë Çlirimtare të Kosovës (UÇK).
Në përmbyllje të mbledhjes, drejtuesit e partisë shprehën përkushtimin për respektimin e vullnetit të anëtarësisë dhe forcimin e demokracisë së brendshme, me synimin për një Kosovë më të zhvilluar, të sigurt dhe të integruar në institucionet euroatlantike.