Partia Demokratike e Kosovës (PDK) ka mbajtur sot mbledhjen e Kryesisë, të dytën pas zgjedhjeve të 28 dhjetorit, në të cilën është diskutuar analiza e procesit zgjedhor dhe e rezultatit elektoral.
Gjatë kësaj mbledhjeje, Kryesia ka adresuar në mënyrë gjithëpërfshirëse çështjet e lidhura me zgjedhjet e fundit, ku PDK u rendit si forca e dytë politike dhe ruajti votën e saj tradicionale. Janë nxjerrë rekomandime konkrete për hapat e mëtejmë politikë dhe organizativë të partisë në të gjitha nivelet.
Si hap i parë drejt forcimit të partisë, Kryesia e PDK-së ka miratuar vendimin për nisjen e përgatitjeve për zgjedhjet e brendshme partiake. Këto zgjedhje do të zhvillohen në të gjitha nivelet organizative, nga nëndegët dhe degët deri te organet qendrore.
Procesi pritet të fillojë gjatë javëve në vijim përmes emërimit të grupeve punuese dhe përpilimit të hapave konkretë. Synimi është zhvillimi i një procesi gjithëpërfshirës, demokratik dhe transparent, që do të kontribuojë në konsolidimin e strukturave, forcimin e unitetit të brendshëm dhe përgatitjen e PDK-së për sfidat politike të ardhshme.
PDK thekson se mbetet e përkushtuar për të vazhduar ngritjen e saj si opozitë kryesore në vend, mbi bazën e reflektimit dhe përgjegjësisë politike, në shërbim të qytetarëve dhe interesit të Republikës së Kosovës.
Përditësime
Partia Demokratike e Kosovës (PDK) arriti 20.19% të votave dhe siguroi 22 mandate në Kuvend. Kjo përqindje është pothuajse e njëjtë me atë të zgjedhjeve të 9 shkurtit 2025, por PDK-ja humbi 2 mandate. Analisti Skënder Zogaj theksoi nevojën për ristrukturim partiak dhe garë të vërtetë, jo formale.