Prokuroria Themelore në Gjakovë ka njoftuar se më 28 janar 2026 ka nisur hetime për dyshime falsifikimi të rezultateve të votimit gjatë numërimit të votave brenda subjekteve politike për zgjedhjet e deputetëve të Kuvendit të Republikës së Kosovës në Komunën e Malishevës.
Në atë datë nuk ishte e mundur të sigurohej prezenca e një kryesuesi të komisionit për intervistim. Më 2 shkurt 2026, pas sigurimit të pranisë së tij dhe zhvillimit të intervistimit, prokurori vendosi ndalimin për 48 orë.
Prokuroria ka paraqitur kërkesë në gjykatën kompetente për caktimin e masës së paraburgimit ndaj tij për dyshimin e veprës penale “Falsifikimi i rezultateve të votimit”, sipas nenit 216 paragrafi 2 të Kodit Penal të Republikës së Kosovës.
Ky rast lidhet me hetimet në të njëjtën komunë. Më 28 janar 2026 janë intervistuar 58 persona, prej tyre 15 kryesues dhe 43 komisionerë. Ndaj 15 kryesuesve u mor vendim për ndalim 48-orësh dhe kërkesë paraburgimi, ndërsa 43 komisionerët do të hetohen në procedurë të rregullt.
Gjykata ka caktuar një muaj paraburgim ndaj 15 kryesuesve të tjerë në Malishevë për të njëjtin dyshim.
Përditësime
Prokuroria Themelore në Prishtinë ka nisur hetimet për parregullsi në numërimin e votave në Podujevë, gjatë zgjedhjeve të 28 dhjetorit 2025.
• Kryeprokurori Enis Gashi deklaroi më 28 janar se në Malishevë, cak i hetimeve janë 18 kryesues dhe 50 komisionerë.