Kryetarët e Podujevës, Prishtinës e Ferizajt mbështesin Marshin Drejtësi, jo politikë

Përfaqësuesit e platformës Liria ka Emër, Eliza Hoxha dhe Ismail Tasholli, kanë zhvilluar takime me kryetarët e komunave të Podujevës, Prishtinës dhe Ferizajt për të mobilizuar qytetarët në Marshin Drejtësi, jo politikë, që mbahet më 17 shkurt në Prishtinë. Ky marsh synon mbrojtjen e vlerave të luftës çlirimtare dhe kundërshtimin e politizimit të drejtësisë, në solidaritet me çlirimtarët e mbajtur në Hagë.

Platforma po zhvillon fushatë mobilizimi në komunat e Kosovës. Gjatë takimeve, Hoxha dhe Tasholli kanë shpjeguar misionin e platformës dhe aktivitetet për këtë iniciativë qytetare.

Mbështetja nga kryetarët e komunave

• Shpejtim Bulliqi, kryetar i Komunës së Podujevës, u zotua për mobilizim masiv: "Angazhimi ynë si komunë është i qartë. Ne do ta përkrahim këtë iniciativë, sepse besojmë se vetëm me solidaritet dhe pjesëmarrje masive mund të mbrojmë idealet që na kanë sjellë lirinë."

• Përparim Rama, kryetar i Komunës së Prishtinës, theksoi se lufta e UÇK-së ishte e drejtë dhe e lindur nga populli: "U bëj thirrje të gjithë qytetarëve të Prishtinës t’i bashkohen masivisht Marshit për drejtësi, në shenjë solidarizimi me çlirimtarët që po mbahen padrejtësisht në Hagë."

• Agim Aliu, kryetar i Komunës së Ferizajt, shprehu mbështetje të plotë: "Lufta për liri dhe pavarësi ka qenë e drejtë dhe çlirimtare. Drejtësia për ata që sakrifikuan për këtë vend nuk guxon të politizohet. I ftoj qytetarët e Ferizajt dhe të gjithë Kosovës që më 17 shkurt të bashkohen në Prishtinë për drejtësi të vërtetë për çlirimtarët tanë."

Eliza Hoxha vlerësoi mbështetjen institucionale: "Mbështetja nga kryeqyteti është dëshmi se kjo kauzë i përket ndërgjegjes qytetare. Marshi Drejtësi, jo politikë është thirrje paqësore për drejtësi të paanshme dhe për respektimin e së vërtetës sonë historike."

Ismail Tasholli shtoi: "Ky Marsh nuk është kundër drejtësisë, por kundër politizimit të saj. Më 17 shkurt marshojmë si qytetarë, për dinjitetin e luftës çlirimtare dhe për drejtësi joselektive."

Platforma Liria ka Emër do të vazhdojë takimet në komunat e tjera për pjesëmarrje sa më të gjerë qytetare.