Projektligji “Për mbrojtjen e konsumatorit” parashikon që norma maksimale efektive vjetore e interesit (NEI maksimal) për një marrëveshje kredie konsumatore të përcaktohet me udhëzim të përbashkët të Bankës së Shqipërisë dhe ministrisë përgjegjëse për mbrojtjen e konsumatorit.
Norma do të përfshijë të gjitha tarifat, komisionet dhe kostot e tjera që lidhen me kredinë, në përputhje me legjislacionin në fuqi. Sipas projektligjit, çdo dispozitë kontraktore që parashikon normë mbi kufirin e lejuar do të jetë absolutisht e pavlefshme. Projektligji parashikon gjithashtu që kreditë konsumatore dhe hipotekare të rregullohen nga Banka e Shqipërisë, në përputhje me legjislacionin e Bashkimit Europian. Kjo mund të krijojë hapësirë për rregullime të mëtejshme edhe për kreditë hipotekare.
Norma tavan për kreditë konsumatore zbatohet në Shqipëri që nga fillimi i vitit 2022, pas ndryshimeve të miratuara nga Banka e Shqipërisë në rregulloren “Për kredinë konsumatore dhe hipotekare”. Banka kishte kërkuar që norma tavan të parashikohej edhe në ligj.
Banka e Shqipërisë e llogarit NEI-n maksimal çdo gjashtë muaj, duke u mbështetur në të dhënat e Regjistrit të Kredive që administron. Nivelet publikohen në fillim të çdo gjashtëmujori dhe bazohen në kreditë e disbursuara gjatë gjashtëmujorit paraardhës. Sipas rregullores, treguesi llogaritet si mesatarja e normës efektive të interesit për secilin produkt dhe interval, e shtuar me një të tretën. Pas ndryshimeve të vitit 2025, për kreditë deri në 200 mijë lekë, NEI maksimal është i barabartë me mesataren e normës efektive të interesit, pa shtesë.
Kufiri është i detyrueshëm për bankat dhe institucionet financiare të licencuara për veprimtari huadhënieje në Shqipëri. Ai u vendos për të mbrojtur konsumatorët nga normat potencialisht abuzive të interesit, të aplikuara kryesisht nga disa institucione financiare jobanka.
Rregullorja kufizon penalitetet dhe kamatëvonesat në 30% të detyrimit kontraktor, të llogaritur mbi vlerën e kësteve të papaguara, përfshirë principalin dhe interesat. Sipas burimeve, tavani u vendos në kontekstin e problemeve me kreditë e këqija dhe proceset e zgjatura të rikuperimit. Penalitetet e larta janë përshkruar si cenim i të drejtave të huamarrësve dhe si nxitje e praktikave joetike të biznesit, veçanërisht nga mbledhësit e borxheve të këqija.