Për shkak të temperaturave të larta që pritet të mbizotërojnë, Ministria e Infrastrukturës dhe Transportit ka njoftuar vendosjen e kufizimeve të përkohshme të qarkullimit për mjetet e transportit të mallrave me masë totale mbi 20 tonë. Sipas njoftimit zyrtar, ndalimi zbatohet ekskluzivisht për të gjitha autostradat gjatë intervalit kohor nga ora 11:00 deri në orën 17:30.
Në njoftimin e ministrisë sqarohet se në rrugët nacionale, rajonale dhe lidhëse, qarkullimi i këtyre mjeteve do të vazhdojë të lejohet pa asnjë kufizim. Kjo masë është pjesë e vendimeve të mëparshme të ministrisë për menaxhimin e trafikut gjatë periudhave me temperatura të larta, të cilat monitorohen çdo ditë nga autoritetet përgjegjëse.
Nga ky kufizim përjashtohen shprehimisht automjetet e organeve të rendit dhe sigurisë publike, ato të shërbimeve emergjente, si dhe mjetet e institucioneve shëndetësore. Ministria u ka bërë thirrje operatorëve ekonomikë dhe drejtuesve të mjeteve të transportit që t'i respektojnë masat e vendosura dhe t’i planifikojnë lëvizjet e tyre duke marrë parasysh orarin e kufizimit.
Kjo masë është në përputhje me vendimin e ministrit në detyrë të Infrastrukturës dhe Transportit, Dimal Basha, të marrë më 8 korrik 2026, për të garantuar sigurinë në komunikacion gjatë ditëve me temperatura të larta, kur parashikimet meteorologjike tregojnë vlera prej 32 gradë Celsius ose më shumë.
Përditësime
Njësitë e trafikut kanë nisur monitorimin e rreptë të zbatimit të kufizimit të qarkullimit për automjetet mbi 20 tonë. Sipas Policisë së Trafikut, tashmë kanë filluar të shqiptohen gjobat e para ndaj kompanive që kanë shkelur urdhrin e vendosur nga Ministria e Infrastrukturës dhe Transportit.