Kampionati Botëror i Futbollit 2026 hap dyert sot, duke shënuar një edicion historik pasi është hera e parë që organizohet nga tri shtete të ndryshme: Shtetet e Bashkuara të Amerikës, Meksika dhe Kanadaja. Ky edicion është më i madhi në histori për nga numri i pjesëmarrësve, duke përfshirë 48 kombëtare përballë 32 ekipeve që kanë marrë pjesë në kampionatet e mëparshme.
Ndeshja hapëse zhvillohet në Meksiko Siti mes kombëtares së Meksikës dhe asaj të Afrikës së Jugut, në orën 21:00 sipas kohës lokale në Kosovë. Turneu do të zgjasë gjithsej 39 ditë, ndërsa akti final do të zhvillohet më 19 korrik në Nju Xhersi, SHBA.
Formati i garës
Ekipet pjesëmarrëse janë ndarë në 12 grupe me nga katër skuadra secili. Sipas rregullores, dy ekipet e para të çdo grupi kualifikohen automatikisht për në rrethin e 32 më të mirëve. Pjesa tjetër e ekipeve që kalojnë në këtë fazë do të përcaktohet nga ekipet e vendit të tretë me rezultatet më të mira në përgjithësi.
Ndër kombëtaret kryesore që do të garojnë për trofeun përfshihen Argjentina, Brazili, Franca, Gjermania, Spanja dhe Anglia. Bie në sy mungesa e Italisë, e cila nuk arriti të kualifikohet, ndërsa gjithashtu mungojnë Kosova dhe Shqipëria, të cilat nuk ia dolën të kalojnë fazën e plejofit.