Albin Kurti, kryeministri i Kosovës, vizitoi Bashkësinë Islame të Kosovës, ku u takua me myftiun Naim Tërnava. Gjatë bisedës, ai diskutoi dy sfida kryesore me të cilat përballet vendi gjatë kësaj pranvere: provokimet rreth kufirit dhe ngritjen e çmimit të naftës.
Kurti shpjegoi se provokimet vijnë nga dy dështime lidhur me Serbinë. "I pari është që nuk kanë një strukturë të brendshme. E dyta është se e kanë kuptuar se nuk mund ta mbajnë peng krejt rajonin për integrime në Bashkimin Evropian. Pra, Brukseli, si kryeqytet i dyfishtë i Bashkimit Evropian dhe NATO-s, po thotë se kush dëshiron të vijë do t’i krijohen shanset, por duhet t’i bëjë detyrat e shtëpisë. Kush nuk dëshiron të vijë nuk mund t’i pengojë të tjerët dhe kjo i ka acaruar shumë serbët, sepse ata e kanë pasur privilegjin që pa ne nuk mund të shkonin askund. Kjo është një dëshpërim i dyfishtë", deklaroi ai.
Sa i përket sfidës së dytë, Kurti theksoi ngritjen e çmimit të naftës si pasojë të luftërave në Lindjen e Mesme. "Luftërat që nisën nuk përfunduan, por nisën ato të rejat dhe këto tash po e bëjnë çrregullimin e zinxhirit të furnizimit. Kemi folur me ministrin e Financave dhe ministren e Tregtisë që të përgatiten sa më mirë, sepse çmimet e naftës dhe produkteve të tjera po rriten", tha ai.
Në takim u trajtua gjithashtu rëndësia e bashkëpunimit institucional dhe roli i institucioneve fetare në ruajtjen e stabilitetit shoqëror.
Sa i përket provokimeve, Kurti kishte reaguar një ditë më parë për stërvitjet e ushtrisë serbe në fshatin Muhoc të Bujanocit, afër kufirit me Kosovën, duke i cilësuar ato si shfaqje agresioni nga Beogradi. Ndërsa KFOR-i, misioni paqeruajtës i NATO-s në Kosovën, deklaroi se stërvitjet e tilla nuk përbëjnë rrezik për sigurinë në rajon.