Kryeministri i Kosovës, Albin Kurti, u takua me ambasadoren e re të Mbretërisë së Holandës në Kosovë, Astrid de Vries. Kurti i uroi mirëseardhje dhe suksese në detyrën e re, ndërsa pranoi urime për mandatin e ri qeverisës dhe zgjedhjen e presidentes. Takimi ishte i pari mes tyre.
Sipas njoftimit të Zyrës së Kryeministrit, Kurti tha se Kosova synon të zgjerojë bashkëpunimin me Holandën në energjinë e ripërtëritshme dhe bujqësi. Në bisedë u përfshi edhe bashkëpunimi në fushën e mbrojtjes. Kurti shprehu mirënjohje për kontributin e Holandës në trajnimin e pjesëtarëve të Forcës së Sigurisë së Kosovës (FSK) dhe tha se Kosova është e gatshme të avancojë ndërveprimin në këtë fushë.
Një tjetër temë ishte marrëveshja për transportin ndërkombëtar të pasagjerëve dhe mallrave. Kurti tha se po punohet që negociatat të përmbyllen sa më parë, pas së cilës marrëveshja synohet të nënshkruhet dhe të ratifikohet.
Në takim u diskutua edhe për konsultimet politike ndërmjet Kosovës, Holandës, Belgjikës dhe Luksemburgut, me synimin për të rritur bashkërendimin strategjik. Bisedimet përfshinë përparësitë e qeverisë për mandatin e ri: projektet në hekurudha dhe diga, si dhe reformat në administratën publike, arsim dhe drejtësi.
Kurti vlerësoi mbështetjen e vazhdueshme të Holandës dhe rolin e saj në proceset integruese të Kosovës. Ai veçoi rëndësinë e këtij roli në raport me statusin e Kosovës si vend kandidat për anëtarësim në Bashkimin Evropian, si dhe në proceset e tjera integruese euro-atlantike.