Kryeministri në detyrë i Kosovës, Albin Kurti, zhvilloi të hënën një takim të përbashkët me ambasadorin e Suedisë në Kosovë, Jonas Westerlund, dhe ambasadorin e Mbretërisë së Bashkuar në Kosovë, Jonathan Hargreaves.
Sipas njoftimit të Zyrës së Kryeministrit, palët diskutuan çështje aktuale politike, përmbylljen e procesit zgjedhor të 28 dhjetorit dhe hapat drejt formimit të institucioneve të reja. Në fokus ishte gjithashtu përcaktimi i prioriteve të qeverisë së ardhshme, si dhe forcimi i bashkëpunimit bilateral në fusha me interes të përbashkët.
Gjatë takimit, Albin Kurti theksoi përkushtimin e qeverisë ndaj sundimit të ligjit në të gjithë territorin e Kosovës, pa diskriminim dhe pa privilegje, për të gjithë qytetarët dhe komunitetet. Ai vuri në pah rëndësinë e rritjes së vazhdueshme ekonomike, progresit shoqëror dhe avancimit demokratik të vendit.
Palët biseduan po ashtu për angazhimin ndaj paqes dhe sigurisë, me rend publik funksional dhe kufij të mbrojtur. Kurti riafirmoi synimin për integrimin e Kosovës në Bashkimin Evropian dhe NATO, duke e cilësuar mbështetjen e partnerëve ndërkombëtarë si element thelbësor në këtë rrugëtim.