Kryeministri i Kosovës, Albin Kurti, në shënimin e Ditës Ndërkombëtare të Gruas më 8 Mars, të organizuar nga Agjencia për Barazi Gjinore në kuadër të Zyrës së Kryeministrit të Republikës së Kosovës, me temën globale “Të Drejta, Drejtësi, Veprim”, deklaroi se drejtësia e barabartë nuk është parim abstrakt, por përgjegjësi konkrete e Republikës së Kosovës.
Ai shpjegoi se drejtësia e barabartë nënkupton zbatim të plotë të të drejtave të garantuara nga Kushtetuta dhe ligjet në çdo gjykatë, vend pune, komunë dhe stacion policie. Dhuna në familje dhe diskriminimi nuk tolerohen, justifikohen apo fshihen, por ndiqen penalisht dhe parandalohen.
Kurti nënvizoi se çdo vajzë dhe grua në Kosovë duhet të ketë qasje të barabartë në arsim dhe mundësi cilësore për jetë e karrierë. Gratë nuk janë vetëm votuese, por edhe vendimmarrëse, me përfaqësim të barabartë në politikë, lidership e institucione publike, si dhe pjesëmarrje kuptimplote në formësimin e së ardhmes së vendit.
Sipas tij, një demokraci nuk mund të jetë e fortë nëse gjysma e popullsisë është e nënpërfaqësuar. Ai shtoi se drejtësia e barabartë kërkon tolerancë zero për dhunën me bazë gjinore, zbatim të urdhrave mbrojtës, mbështetje për të mbijetuarat, përgjegjësi për autorët, barazi në paga dhe qasje të barabartë në shërbime shëndetësore.