Kryeministri në detyrë, Albin Kurti, pas takimit me Vjosa Osmanin dhe kreun e LDK-së, Lumir Abdixhiku, ka sqaruar qëndrimin e tij në lidhje me procesin e zgjedhjes së presidentit të ardhshëm të Kosovës. Ai theksoi se fokusi i diskutimeve nuk ka qenë te emrat e përveçëm, por te parimet dhe vizioni politik që duhet të udhëheqin këtë proces.
Sipas Kurtit, presidenti i ri duhet të jetë një figurë që shpreh unitetin e popullit, në përputhje me frymën dhe germën e Kushtetutës. Ai vlerësoi se sigurimi i një konsensusi sa më të gjerë është i nevojshëm për të garantuar pjesëmarrjen e numrit maksimal të deputetëve në ditën e votimit.
Sfida kryesore, sipas kryeministrit, mbetet arritja e pragut minimal prej 80 deputetësh të pranishëm në sallë, një numër që ai e cilësoi si vështirë të arritshëm. Kurti rikujtoi se në të kaluarën janë diskutuar emra të ndryshëm për këtë post, si Glauk Konjufca dhe Feride Rushiti, por nënvizoi se aktualisht vëmendja është e përqendruar te strategjia për të siguruar kuorumin e nevojshëm për zgjedhjen e presidentit në orar.