Pas përfundimit të një takimi 3-orësh me kryetarin e Lidhjes Demokratike të Kosovës (LDK), Lumir Abdixhikun, kryeministri në detyrë, Albin Kurti, ka ftuar për bashkëbisedim përfaqësuesit e partive të tjera opozitare. Kurti shprehu gatishmërinë për t’u takuar me kryetarin e Aleancës për Ardhmërinë e Kosovës (AAK), Ardian Gjinin, dhe kryetarin e Partisë Demokratike të Kosovës (PDK), Bedri Hamzën.
Duke iu drejtuar mediave, kryeministri në detyrë vlerësoi se është e nevojshme të zhvillohen bisedime për çështje të ndryshme, pavarësisht dallimeve politike. Ai e quajti të paarsyeshme mungesën e takimeve, veçanërisht në kushtet ku komunikimi me politikanë të tjerë, vendorë e ndërkombëtarë, është i shpeshtë. Lidhur me përpjekjet e mëparshme, Kurti theksoi se kishte tentuar të takohej me Ardian Gjinin, por pa sukses, ndërsa vërejti se krerët e AAK-së dhe PDK-së ishin vetëpërjashtuar nga procesi i bisedimeve në faza të ndryshme.
Kryeministri theksoi se ka shumë tema për t’u diskutuar dhe beson se ekzistojnë pika të përbashkëta për të cilat palët mund të pajtohen. Ndërkohë, takimet mes Kurtit dhe Abdixhikut pritet të vijojnë edhe në ditët në vijim, pasi deri më tani nuk është arritur një marrëveshje formale politike mes tyre.