Kryetari i Lëvizjes Vetëvendosje, Albin Kurti, ka shprehur pakënaqësi pas refuzimit të ftesës për takim nga ana e kryetarit të Aleancës për Ardhmërinë e Kosovës (AAK), Ardian Gjini. Pas takimit të zhvilluar me kryetarin e Partisë Demokratike të Kosovës (PDK), Bedri Hamza, Kurti deklaroi para mediave se një qasje e tillë nuk është e duhur.
"Nuk besoj që është në rregull që një parti e respektuar si AAK-ja të refuzojë takimin me mua si kryeministër dhe kryetar i partisë fituese të zgjedhjeve", u shpreh Kurti. Sipas tij, dialogu ndërpartiak është thelbësor për funksionimin e institucioneve të shtetit, pavarësisht nëse subjektet do të bashkëpunojnë në një koalicion qeverisës apo jo.
Kurti theksoi se Lëvizja Vetëvendosje është subjekti fitues dhe se bashkëpunimi institucional mbetet një obligim për të gjitha palët. Në lidhje me takimin e zhvilluar më herët me Bedri Hamzën, burimet bëjnë me dije se ky takim ka përfunduar pa ndonjë marrëveshje konkrete politike për qeverisjen e vendit.