Kryetari i Aleancës, Ardian Gjini, ka bërë të ditur qëndrimin e tij refuzues ndaj një takimi të mundshëm me kreun e LVV-së, Albin Kurti, në mjediset e zyrës së këtij të fundit. Në një paraqitje në emisionin FRONTAL të televizionit T7, Gjini deklaroi se nuk e sheh të besueshëm kryeministrin në detyrë dhe e akuzoi atë për tradhti ndaj partnerëve të mëparshëm politikë.
Duke shpjeguar arsyet e refuzimit, Gjini nënvizoi se pozicioni i Aleancës lidhur me procesin e formimit të institucioneve është i qartë dhe i vendosur. Sipas tij, partia ka paraqitur një listë me gjashtë pika konkrete, të cilat kërkojnë të zbatohen nga Kurti. Në lidhje me modalitetet e dialogut, Gjini propozoi një variant tjetër komunikimi, duke theksuar se nuk do të pranojë takime private ose kokë më kokë.
“E kam ofruar që ai me e zgjedhur studion dhe gazetarin. Por nuk shkoj në zyrë të tij për t’u takuar vetëm për vetëm, sepse është jo i besueshëm, i ka tradhtuar të gjithë partnerët dhe fundi i fundit nuk kam arsye me e takuar sepse pozicioni i Aleancës është shumë i qartë”, deklaroi Gjini.