Kryeministri i Kosovës, Albin Kurti, mori pjesë në edicionin e katërt të konferencës ndërkombëtare KosovaPAR 2026, ku në fokus janë reforma e administratës publike, digjitalizimi dhe forcimi i besimit të qytetarëve në institucione. Konferenca organizohet nga Ministria e Digjitalizimit dhe Administratës Publike dhe këtë vit mbahet me temën “Vlera publike dhe e mira e përbashkët – njerëzit, besimi dhe digjitalizimi”.
Kurti tha se qytetarët presin shërbime cilësore, vendime të drejta, institucione transparente dhe një shtet që u përgjigjet nevojave të tyre. Sipas tij, reforma e administratës publike duhet të sjellë rezultate konkrete në jetën e qytetarëve, ndërsa institucionet duhet të bashkëpunojnë për t’i bërë shërbimet më të thjeshta dhe më të qasshme.
Ai theksoi se qytetarët nuk duhet të kenë nevojë të njohin hartën administrative të shtetit për të marrë një shërbim. Institucionet duhet të koordinohen dhe t’u përgjigjen qytetarëve në mënyrë sa më të thjeshtë e të integruar, tha Kurti.
Duke folur për përdorimin e inteligjencës artificiale në administratën publike, kryeministri tha se teknologjia duhet të përdoret në funksion të interesit publik. Ai theksoi se përdorimi i saj duhet të jetë i përgjegjshëm, transparent dhe i sigurt, me mbikëqyrje njerëzore dhe respekt për të drejtat e qytetarëve.
Kurti tha se besimi në institucione ndërtohet përmes vendimeve të drejta, transparencës dhe llogaridhënies. Ai theksoi gjithashtu se profesionalizimi i administratës mbetet i rëndësishëm për avancimin e reformave dhe integrimin evropian të Kosovës.
Ministri i Digjitalizimit dhe Administratës Publike, Lulëzon Jagxhiu, theksoi rëndësinë e reformave dhe përmirësimit të shërbimeve publike. Sipas tij, rezultati duhet të jetë një shërbim më i mirë, vendimmarrje më e drejtë dhe institucione që u përgjigjen nevojave të qytetarëve dhe mbajnë përgjegjësi për punën e tyre.
Konferenca KosovaPAR 2026 shërben si platformë për shkëmbimin e përvojave dhe diskutimin e praktikave që synojnë ndërtimin e një administrate publike më efikase dhe më të orientuar drejt qytetarëve.