Instituti Demokratik i Kosovës (KDI) ka mbajtur tryezën e diskutimit me temë “Prokurimi publik në Kosovë: Përtej ndryshimeve teknike – Drejt një reforme strukturore të prokurimit publik në Kosovë”. Në këtë ngjarje morën pjesë përfaqësues të institucioneve, deputetë dhe ekspertë të shoqërisë civile, të cilët analizuan sfidat aktuale të sistemit.
Menaxheri i programeve në KDI, Florent Spahija, theksoi se prokurimi publik nuk duhet trajtuar thjesht si procedurë administrative, por si mekanizëm që ndikon drejtpërdrejt në jetën e qytetarëve. Ai shtoi se debati duhet të zhvendoset nga procedurat te rezultatet e investimeve publike.
Koordinatorja për avokim dhe hulumtim në KDI, Diana Metushi Krasniqi, vuri në dukje se megjithëse digjitalizimi ka shënuar përparim, sistemi vuan nga mangësi strukturore që nga viti 2011. Ajo shprehu shqetësimin mbi përjashtimin e shoqërisë civile nga grupi punues i krijuar në janar 2026.
Deputetja e Kuvendit të Kosovës, Eliza Hoxha, potencoi nevojën për vullnet politik dhe gjithëpërfshirje, duke propozuar ndarjen e funksioneve të blerjes nga ato të prokurimit dhe krijimin e një Katalogu Shtetëror të Çmimeve. Deputetja Janina Ymeri kritikoi mënyrën e buxhetimit, duke e cilësuar copëzimin e projekteve në katër ose pesë vite si pengesë për institucionet dhe komunat në përmbushjen e punëve.
Sipas analizës së KDI-së, reforma e nevojshme duhet të ndryshojë qasjen aktuale duke u fokusuar te:
• Zhvendosja nga transparenca formale drejt performancës konkrete.
• Menaxhimi i plotë i ciklit të prokurimit, përtej procesit të tenderimit.
• Garantimi i vlerës për paranë publike përmes mbikëqyrjes dhe zbatimit të ligjit.