Lëvizja Vetëvendosje (LVV) mbajti të dielën, në zyrën qendrore në Prishtinë, mbledhjen e parë të përbashkët me drejtuesit e qendrave të saj, pas zgjedhjeve të përgjithshme parlamentare të 2025-ës dhe përmbylljes së cikleve zgjedhore lokale.
Në mbledhje morën pjesë kryeministri dhe kryetari i LVV-së, Albin Kurti, sekretari organizativ Alim Rama, si dhe koordinatori i qendrave Salih Zyba.
Gjatë takimit u diskutua gjerësisht për situatën aktuale politike në vend, fushatën zgjedhore të LVV-së – e cila u kurorëzua me mbështetje qytetare prej 51.10% dhe 57 ulëse në Kuvendin e Republikës së Kosovës.
Po ashtu, u trajtuan çështje që lidhen me procesin e certifikimit të rezultatit zgjedhor dhe konstituimin e institucioneve të reja.
Një vëmendje e veçantë iu kushtua aspektit organizativ të Lëvizjes, funksionimit dhe organizimit në qendra, si dhe çështjeve të tjera për forcimin e strukturave.
LVV mbetet e përkushtuar ndaj organizimit të brendshëm demokratik, përfaqësimit të denjë të qytetarëve dhe realizimit të programit qeverisës në shërbim të Republikës.