Kryeministri i Kosovës, Albin Kurti, ka udhëtuar më 21 tetor drejt Malit të Zi, ku do të përfaqësojë Kosovën në Samitin e Liderëve të Procesit të Berlinit, që mbahet më 22 tetor në Miloçer, pranë Budvës. Samiti shënon përmbylljen e kryesimit malazez të Procesit të Berlinit për vitin 2026.
Sipas njoftimit të Zyrës së Kryeministrit të Kosovës, Kurti pritet të zhvillojë gjatë samitit takime dypalëshe me drejtues e përfaqësues të institucioneve ndërkombëtare, zyrtarë të lartë dhe krerë shtetesh.
Kryeministri i Malit të Zi, Milojko Spajiq, dhe kancelari gjerman, Friedrich Merz, do ta hapin samitin. Pjesëmarrjen e ka konfirmuar edhe komisionerja e BE-së për Zgjerim, Marta Kos. Në takim pritet të marrin pjesë liderët e Ballkanit Perëndimor, përfaqësues të shteteve pjesëmarrëse në Procesin e Berlinit dhe zyrtarë të Bashkimit Evropian e të organizatave ndërkombëtare. Kryeministri i Maqedonisë së Veriut, Hristijan Mickoski, është gjithashtu ndër pjesëmarrësit e njoftuar.
Sipas programit paraprak të Qeverisë malazeze, liderët do të mbërrijnë nga ora 09:30. Në atë kohë janë parashikuar deklarata për mediat e akredituara. Samiti pritet të nisë në 10:20. Fjalimet hapëse do të transmetohen në kanalin zyrtar të Qeverisë së Malit të Zi në YouTube, ndërsa takimi i liderëve do të zhvillohet pa praninë e mediave.
Konferenca e përbashkët për media e Spajiqit dhe Merzit është planifikuar për 13:00, jashtë vilës në Plazhin e Mbretëreshës. Fotografia zyrtare e pjesëmarrësve është planifikuar për 13:30, jashtë vilës Miloçer, ku do të kenë qasje fotografët e akredituar. Në rast të motit të pafavorshëm, konferenca mund të mbahet në hotelin Maestral. Fotografitë dhe videot nga ngjarja do të publikohen në llogarinë e Qeverisë malazeze në Flickr.
Qeveria e Malit të Zi njoftoi se gjatë kryesimit të këtij viti janë zhvilluar 26 veprimtari, prej të cilave 14 në nivel ministror. Programi përfshiu takime për punët e jashtme dhe të brendshme, ekonominë, bujqësinë e mbrojtjen e mjedisit, si dhe veprimtari me pjesëmarrjen e përfaqësuesve të akademisë, shoqërisë civile, biznesit, mediave dhe të rinjve. Në samit do të diskutohen ndërlidhja ekonomike rajonale, siguria dhe përshpejtimi i integrimit në Bashkimin Evropian.