Albin Kurti, kryeministër në detyrë i Kosovës, të enjten në Shtëpinë e Kosovës në Davos, zhvilloi një takim me Dr. Sabeeh Al-Mukhaizeem, ministër i Energjisë Elektrike, Ujit dhe Energjisë së Ripërtëritshme, ushtrues detyre i ministrit të Financave dhe ministër i Shtetit për Çështje Ekonomike dhe Investime i Shtetit të Kuvajtit.
Takimi u cilësua nga Kurti si pozitiv dhe konstruktiv. Ai falënderoi ministrin kuvajtian për mbështetjen e fuqishme dhe të vazhdueshme të Kuvajtit ndaj përparimit ekonomik të Kosovës dhe njohjes së saj ndërkombëtare.
Fokus i veçantë iu kushtua planeve ambicioze të Qeverisë së Kosovës për mandatin e ardhshëm. Palët diskutuan një sërë mundësish investimi me interes për Shtetin e Kuvajtit dhe bizneset kuvajtiane, përfshirë sektorët:
• energjisë;
• hekurudhave;
• stadiumeve;
• rezervuarëve të ujit.
Kurti e bëri të ditur këtë në një postim në platformën X.