Kryeministri në detyrë, Albin Kurti, bëri të ditur se pas përmbylljes së procesit të numërimit të votave nga Komisioni Qendror i Zgjedhjeve, hapi i ardhshëm do të jetë certifikimi i rezultateve dhe konstituimi i shpejtë i institucioneve të reja të vendit.
Sipas Kurtit, Lëvizja Vetëvendosje nuk mund ta realizojë e vetme zgjedhjen e presidentit apo presidentes, për shkak të kërkesës kushtetuese për praninë e 80 deputetëve në sallë gjatë votimit. Në këtë kontekst, kreu i ekzekutivit ftoi opozitën për një qasje më konstruktive, duke rikujtuar se ofertat për bashkëpunim të ofruara në të kaluarën ishin refuzuar.
Duke iu referuar vendimeve të Gjykatës Kushtetuese, Kurti shprehu qëndrimin e tij kritik ndaj interpretimeve të këtij institucioni. Ai vlerësoi se Gjykata Kushtetuese duhet të kufizohet në interpretimin e normave ekzistuese, pa ndërhyrë në rishkrimin apo amendamentimin e Kushtetutës, fenomen të cilin ai e përshkroi si aktivizëm juridik.
Përditësime
Kryeministri Albin Kurti përjashtoi të martën mundësinë e koalicioneve qeverisëse me partitë opozitare, duke rikujtuar refuzimin e tyre ndaj ofertave të mëparshme për bashkëqeverisje. Gjatë përurimit të një rruge, Kurti theksoi se aktgjykimi i Gjykatës Kushtetuese për pozitën e presidentit nuk përbën vetëm një interpretim, por vendos një normë të re juridike.