Më 24 mars 2026, kryeministri i Republikës së Kosovës, Albin Kurti, i shoqëruar nga anëtarë të kabinetit, priti drejtues dhe përfaqësues të organizatave ndërkombëtare të gazetarëve dhe mediave.
Në takim morën pjesë përfaqësues të:
- Reporterëve Pa Kufij (RSF),
- Asociacionit të Gazetarëve Evropian (AEJ),
- Federatës Evropiane të Gazetarëve (EFJ),
- Unionit të Transmetuesve Evropian (EBU),
- Qendrës Evropiane për Liri të Shtypit dhe Medias (ECPMF),
- Indeksit të Censurës,
- Observatorit të Ballkanit dhe Kaukazit Transeuropa (OBCT),
- Institutit Ndërkombëtar të Shtypit (IPI).
Gjatë takimit, kryeministri Kurti theksoi se liria e medias është e një rëndësie fondamentale për Qeverinë e Republikës së Kosovës.
Ai vuri në pah se Kosova ka një mjedis mediatik të larmishëm dhe pluralist, ku liria e shprehjes jo vetëm mbrohet, por edhe ushtrohet, përfshirë nëpërmjet kritikës ndaj qeverisë.
Megjithatë, Kurti shprehu shqetësimet për mungesën e transparencës së pronësisë së mediave dhe ndikimin e interesave korporative.
Pasi dëgjoi çështjet e ngritura nga përfaqësuesit e organizatave, kryeministri Kurti i falënderoi për vizitën dhe diskutimin.
Ai shprehu gatishmërinë dhe vullnetin e Qeverisë së Republikës së Kosovës për bashkëpunim të mëtejshëm.