Albin Kurti, kryeministër i Republikës së Kosovës, së bashku me ministrin e Financave, Hekuran Murati, pritën në takim përfaqësuesit e Bankës Evropiane për Rindërtim dhe Zhvillim (BERZh).
Në takim u diskutua thellimi i bashkëpunimit ndërmjet Qeverisë së Kosovës dhe BERZh-it, me theks në avancimin e projekteve infrastrukturore dhe zbatimin e Memorandumit të Mirëkuptimit të nënshkruar në vitin 2024. Ky memorandum parasheh një portofol investimesh deri në 400 milionë euro deri në vitin 2027.
U trajtuan projektet prioritare në fushat:
• infrastrukturës rrugore;
• ujërave të zeza;
• sistemit të ujit;
• efikasitetit të energjisë;
• transportit publik.
Gjithashtu u përmendën mundësitë për nënshkrimin e marrëveshjeve të reja financimi gjatë viteve 2026-2027.
Albin Kurti falënderoi BERZh-in për mbështetjen e vazhdueshme ndaj Kosovës dhe nënvizoi rëndësinë e partneritetit për realizimin e projekteve strategjike, që përmirësojnë infrastrukturën dhe shërbimet për qytetarët. Përfaqësuesit e BERZh-it riafirmuan gatishmërinë për bashkëpunim të ngushtë me institucionet kosovare në zbatimin e projekteve zhvillimore dhe mbështetjen e reformave ekonomike.