Albin Kurti, kryeministër në detyrë i Kosovës, ka njoftuar se regjistrimi i të porsalindurve kryhet tani në mënyrë digjitale. Qytetarët nuk kanë më nevojë të lëvizin nga një institucion në tjetrin për procedurat pas lindjes së fëmijës.
Të dhënat e të porsalindurit dhe prindërve regjistrohen në spitale përmes tabletit dhe barten automatikisht në sistemet shtetërore. Këto të dhëna integrohen në sistemin shëndetësor, regjistrin civil, skemat e benefiteve për fëmijë dhe lehona, si dhe institucione të tjera relevante. Kështu eliminohen dokumentet fizike dhe aplikimet e ndara.
Shërbimi, i pilotuar me sukses në Gjilan dhe Ferizaj, u shtri të hënën në Prishtinë, konkretisht në Klinikën e Gjinekologjisë të QKUK-së. Shpejt do të zbatohet edhe në Prizren dhe Vushtrri, për të vazhduar më pas në Gjakovë, Pejë dhe në të gjithë Republikën e Kosovës.
Njoftimi u bë përmes një postimi në Facebook nga Albin Kurti.